وَحْرَّكْتُ كْتَابِي
بَعْدَ مَا تْسَدْ بَابِي
مَاشِي
بْسَارُوتْ وَقْفَلْ
بْصَدَى وَغَدْرْ
مِنْ أَعَزّْ حْبَابِي

كْلْتْ نْحْسَبْهُمْ
فَاتْ حْسَابْهُمْ
وْرَقْ شْجَرْ
وَ مْوَاجْ لْبَحْرْ
آهَاتْ جْمْرْ
حَبَّاتْ رْمْلْ
وْزَادْ زَنْدْ عَذَابِي

تْوَسَّدْتْهُمْ رُكْبَة
لْقِيتْهَا عَتْبَة
حَجَرْهَا
مَا هُوْ طِينْ حْنِينْ
وَلَا شَوْكْ
مَغْرُوسْ فِي الْعِينْ
حَجَرْهَا
حَجَرْ مَطْمُورَة
عَرْضْهَا وَاسِعْ
مْنَبِّتْ
بْرْيُوسْ صْخُورَة
لَا عَطْفَة الْخَاوَة
وَلَا مَحْنَة الْجُورَة

وَحَرَّكْتُ كِتَابِي
بَعْدَ مَا وْرَاقُو
دْخَلْتْهُمْ سُوسَة
سَاسَتْ كْتَافِي
قَطَّعَتْ نَفَاسِي
طَيَّرَتْ نْعَاسِي
الْعِينْ مْشَرَّعَة تْقَاسِي
بْشُوفَاتْ خْلَاتْنِي
نْتَمْنَّى وَنْغِيرْ
مِنْ قْلِيلْ لْفْهَمْ
مَرْفُوعْ عَلِيهْ الْقَلَمْ
مَا يْخَمَّمْ
مَا يْحَاسْبْ مَا يْنْدَمْ

وَحْرَّكْتُ كْتَابِي
عُنْوَانُو(ه) كَانْ جَمِيلْ
مَا فِيهْ دُمُوعْ تْسِيلْ
وَلَا آهَاتْ تْنِينْ
كْتَبْتْ عَلِيهْ كْلَامْ جَمِيلْ
حُبّ جْنُونِي
النَّاسْ مْنو تْغيرْ
ذِكْرَيَاتْ بُثَيْنَة وَجَمِيلْ
غْدَرْ وَعْطَى بْضْهَرْ
كَّالْ رْبَحْتْهَا
بْحَالْ اللِّي كَانْ
لَاعْبْ لْقْمَرْ
سْدِيتْ غْلَافُو
قَطَّعْتْ وْرَاقُو
وَفْوَسْطْ نَارْ مْهِيلَة
تْحَرَّكَتْ حْيَاتِي
وَحَرَّكْتُ كِتَابِي
وَحَرَّكْتُ كِتَابِي

وْ حْرَكت كْتابي
وَأَنَا مَالِي وَمَالْ عْذَابِي
مْنْ جْدَرْ كْلَعْتُوووو
تْشَكِّيتْ وَبْكِيتْ
لْمْتْ سحاب اللَّيَالِي
رْعْدَكْ زَعْزَعْ حْيَاتِي
بْرْدَكْ خلاني نْقَاسِي
شْتَاكْ كُلْها مَٱسِي
ثْلْجَكْ بَرْدْ إِحْسَاسِي
هْرَبْتْ
وَفْ سْبَاتْ عَمِيقْ
رْجَعْتْ نْعَاسِي
وَحَرَّكْتُ كِتَابِي
وَحَرَّكْتُ كِتَابِي.